na koi apna gham hai aur na ab koi ḳhushi apni
tumhin kah do ki ham kaise guzaren zindagi apni
fareb-e-ham-safar hai aur rah-e-gham ka sannaTa
munasib hai ki ḳhud ho ai junun ab rahbari apni
ujala mahfilon men kar ke bhi aansu hi haath aa.e
na raas aa.i kabhi ḳhud sham.a ko bhi raushni apni
guzarish hai ki ai ma.abud mujh ko zabt-e-gham de de
na kar de faash raz-e-arzu ko bekasi apni
taḌap ja.ega har dil shams’ ka jab naam aa.ega
numayan yuun bhi hogi dastan-e-gham kabhi apni
Leave a Reply