be-vajh nahin gard pareshan pas-e-mahmil
aata hai koi be-sar-o-saman pas-e-mahmil
az-bas kashish-e-ishq se agah thi laila
thi dekhti vo fitna-e-dauran pas-e-mahmil
kis sokhta ki khaak se uttha hai bagula
ik shoala-e-javvala hai pechan pas-e-mahmil
fikr-e-qadam-e-naqa hua qais ko paida
dekha jo hain sahra-e-mughilan pas-e-mahmil
ai naqa-kash itni bhi na tu tez-ravi kar
majnun zi-khud-o-rafta hai nalan pas-e-mahmil
shayad main use dekhun ‘havas’ ba-lab-e-khandan
jaata huun is ummid pe giryan pas-e-mahmil
Leave a Reply