Qamar Jameel
vo baten ishq kahta tha ki saara ghar mahakta tha
mira mahbub jaise gul tha aur bulbul chahakta tha
safar men shaam ho jaati to dil men sham.en jal uThtin
lahu men phuul khil jaate jahan ghuncha chaTakta tha
kabhi main sarv ki surat nazar aata tha yaron ko
kabhi ghunche ki surat apne hi dil men dhaḌakta tha
ḳhuda jaane main us ke saath rahta tha ki a.ina
mire parde men apne-ap ko hairat se takta tha
ḳhuda jaane vo kaisa aadmi tha jis ke mathe par
koi bindiya lagata tha to ik jugnu chamakta tha
kabhi rahta tha us ke saath main us ke gareban men
kabhi furqat men apne aa.ine par sar paTakta tha
andheri raat jab savan men aati thi to ik bulbul
ḳhuda jaane kahan se aa ke mere ghar chahakta tha
Leave a Reply