shaikh-e-haram us but ka parastar hua hai
but-khana-nashin bandh ke zunnar hua hai
har harf pe do aansu tapak padte hain ai vaae
khat yaar ko likhna hamen dushvar hua hai
kotah na samajh ah-e-zaifan ko ye tiir
sau baar dil-e-arsh se bhi paar hua hai
ai said-fagan gham se tire duuri ki mera
har zakhm-e-dil ik dida-e-khun-bar hua hai
hasti tiri parda hai utha de ise ghafil
kyuun aisa hijab-e-rukh-e-dildar hua hai
aage tire thi garm-e-sukhan hone ki hasrat
so bharna dam-e-sard bhi dushvar hua hai
kar qadr tu ‘rasikh’ ki ki is tarah ka azad
yuun daam men aa tere giraftar hua hai
Leave a Reply