Mahaz-E-Nur Se Yaksar haTa Diye Gae Hum

Muhib Wafa

mahaz-e-nur se yaksar haTa diye ga.e ham

misal-e-sham-e-sahari bujha diye ga.e ham

saron ki fasl pe shayad zakat vajib thi

so is nisab se ab ke ghaTa diye ga.e ham

makin-e-ḳhuld hain ham bhi nasab ki nisbat se

zamin pe hasb-e-mashiyyat basa diye ga.e ham

visal-o-hijr bhi hain faisle nasibon ke

kisi se bichhḌe kisi se mila diye ga.e ham

badan ke bojh se ik umr tak niDhal rahe

zamin ki god men aḳhir sula diye ga.e ham