jab tak fasil-e-jism ka dar khul na ja.ega
is dil ki yurishon ka tasalsul na ja.ega
ḳhemon se ta-furat jo dariya-e-ḳhun hai ye
us par se maslahat ka koi pul na ja.ega
us ko guman nahin tha ki ahd-e-ḳhizan men bhi
ye zauq-e-naghma-rezi-e-bulbul na ja.ega
ye abr-e-agahi jo barasta raha yunhi
miTTi ka ye vajud mira ghul na ja.ega
girta rahega yunhi balaon ka abshar
jab tak ghubar-e-qalb-o-nazar dhul na ja.ega
vo shaḳhs to ḳhuda.i ke daave pe tul gaya
is had pe ham samajhte the bilkul na ja.ega
bas ai nigar-e-zist yaqin aa gaya hamen
ye teri be-ruḳhi ye ta.ammul na ja.ega
‘anjum’ nigar-e-zist ko phir chahiye vahi
ik sar jo ḳhvahishon ke evaz tul na ja.ega
Leave a Reply