Poet
kab mere vaste koi mushkil nahin rahi
kab maut zindagi ke muqabil nahin rahi
duniya ki dosti ka to kya zikr kijiye
duniya to dushmani ke bhi qabil nahin rahi
yuun meri zindagi hai har ik shai se duur duur
jaise ye ka.enat men shamil nahin rahi
tasvir-e-inqilab bana ja raha huun main
ab meri mustaqil koi manzil nahin rahi
iz.har-e-be-vafa-e-duniya na kijiye
duniya kisi ke dard men shamil nahin rahi
naqshe badal chuke hain nizam-e-hayat ke
kashti-e-zist talib-e-sahil nahin rahi
aaya har ek gaam pe ik inqalab-e-nau
insan ki mustaqil koi manzil nahin rahi
ḳhud mushkilon ko jis ne gale se laga liya
phir us ke vaste koi mushkil nahin rahi
‘sharib’ ye kya hua ki har ik shai hai ajnabi
vo ham nahin rahe ki vo mahfil nahin rahi
Leave a Reply