Mera Dil Dekho Ab Ya Mere Dushman Ka Jigar Dekho

Nooh Narvi

mira dil dekho ab ya mere dushman ka jigar dekho

tumhare bas men ankhen hain jidhar jaao udhar dekho

qayamat men na mere munh se phir fariyad niklegi

agar ye kah diya us ne yahan aao idhar dekho

tumhare naam par mar miTne vaala kaun hai main huun

agar socho agar samjho agar maano agar dekho

mire dil ko chara kar phir churao aankh kya ma.ani

nigah-e-qahr hi se tum mujhe dekho magar dekho

jo kahta huun fana ke ba.ad sab ko chain milta hai

to vo kahte hain phir ab der kya tum bhi mar dekho

raqibon ko tum ankhen to dikhate ho sar-e-mahfil

kahin aisa na ho ban jaa.e meri jaan par dekho

kisi ko dekh kar ai ‘nuh’ kaisi kuchh bani dil par

ye kis kam-baḳht ne tum se kaha tha tum idhar dekho