ḳhūn-e-nāhaq kā samundar nahīñ dekhā jaatā
ab tabāhī kā ye manzar nahīñ dekhā jaatā
jab se hai qaid hisāroñ meñ takabbur ke anā
ḳhud se ūñchā koī paikar nahīñ dekhā jaatā
jaane kab kaun hameñ desh nikālā de de
sar pe laTkā huā ḳhanjar nahīñ dekhā jaatā
jo zarīya thā shikam-serī-e-insāñ kā sadā
peT par bāñdhe hai patthar nahīñ dekhā jaatā
aaj insāñ hai shikanje meñ hasad ke aise
TūTne par haiñ ka.ī ghar nahīñ dekhā jaatā
terī āzurda sī muskān se bekal hai ‘shifā’
ek tūfāñ tire andar nahīñ dekhā jaatā