Anwar Shuoor
un ki surat hamen aa.i thi pasand ankhon se
aur phir ho ga.i bala-o-buland ankhon se
koi zanjir nahin tar-e-nazar se mazbut
ham ne is chand pe Daali hai kamand ankhon se
Thahr sakti hai kahan us ruḳh-e-taban pe nazar
dekh sakta hai use aadmi band ankhon se
ham uThate hain maza talḳhi o shirini ka
mai piyale se pilata hai vo qand ankhon se
baat karte ho to hota hai zaban se sadma
dekhte ho to pahunchta hai gazand ankhon se
har mulaqat men hoti hain hamare mabain
chand baten lab-e-guftar se chand ankhon se
ishq men hausla-mandi bhi zaruri hai ‘shu.ur’
dekhiye us ki taraf hausla-mand ankhon se
Leave a Reply