din nikalta hai to saman-e-safar DhunDte hain
raat paḌti hai to ham apni ḳhabar DhunDte hain
rabta kuchh to rahe ruuh ka patal ke saath
aaj ham bhi tiri ankhon men bhanvar DhunDte hain
koi ḳhushbu na yahan anjum-o-mahtab ki zau
in gharon se bahut aage hai jo ghar DhunDte hain
ishq se dad-talab hain ki ham avara-manash
dar men divar na divar men dar DhunDte hain
kyuun juda.i ke mah-o-sal men badle tu ne
aa mohabbat ke vahi sham-o-sahar DhunDte hain
vo jo ab sarhad-e-imkan se pare rahta hai
kab vo ‘ja.afar’ hamen milta hai magar DhunDte hain
Leave a Reply