sada.en deta rahta hai ki ai maula dikha.i de
tu ya.ani chahta hai ki vo hai kaisa dikha.i de
nikal bahar tu in dair-o-haram ke mas.alon se phir
mohabbat hi mohabbat ki tujhe duniya dikha.i de
main mandir men bhi jaata huun main masjid men bhi ja.unga
ḳhuda har samt hi mujh ko bas ik jaisa dikha.i de
na jaane rabt ye kaisa hai us insan se mera
kabhi jo muund luun ankhen vahi chehra dikha.i de
ye jo hai ishq ka rasta ye aisa ek rasta hai
jahan koi nahin manzil faqat rasta dikha.i de
Leave a Reply