Abhay Kumar Bebak
kisi ki raah ka patthar hata raha huun abhi
safar ko aur bhi mushkil bana raha huun abhi
use ye jaan kar achchha bahut lagega magar
main us ki yaad men sab kuchh bhula raha huun abhi
main saath apne hi saae ka chhod duun na kahin
ki sar pe dhuup ghamon ki utha raha huun abhi
hayat tu bhi to dhoke se kam nahin lekin
fareb tere liye sab se kha raha huun abhi
main andhiyon se dara kab ki aaj ghabraun
to phir diye se diye kyuun jala raha huun abhi
mujhe padhe to koi kis tarah padhe ‘bebak’
main khud ko aab pe likh kar mita raha huun abhi
Leave a Reply