Rizvan Anjum
dil men junun-e-ishq jagane ka vaqt hai
ab ain shiin qaaf milane ka vaqt hai
ahl-e-suḳhan ki shaan baḌhane ka vaqt hai
ab diip chahaton ke jalane ka vaqt hai
ab is ke baad khel na khele koi yahan
maidan men husain ke aane ka vaqt hai
ta.abir ki sahar ne sada di hai phir unhen
bistar pe so.e ḳhvab jagane ka vaqt hai
tum puchhte ho kis liye maḳhmur ham hue
mai-kash yahi to pyaas bujhane ka vaqt hai
ḳhud ko nava-e-soz men mat Dhalo sha.iro
iqbal ki ḳhudi ko baḌhane ka vaqt hai
ḳhushbu tamam shahr men phaile ho ashti
taḳhliq men vo lafz sajane ka vaqt hai
Leave a Reply