kya lutf havaon ke safar men nahin rakkha
ya jazba-e-parvaz hi par men nahin rakkha
nanha sa diya bhi shab-e-tira men bahut hai
sauda kisi ḳhurshid ka sar men nahin rakkha
bujh ja.enge ḳhvabon ke charagh ab-e-ravan se
is Dar se unhen dida-e-tar men nahin rakkha
shayad dar-o-divar bhi pahchan na paa.en
barson se qadam apne hi ghar men nahin rakkha
har roz koi taḳhta magar TuuT raha hai
har-chand ki kashti ko bhanvar men nahin rakkha
suraj to paraya tha paraya hi raha vo
kyuun tum ne shajar rah-e-guzar men nahin rakkha
takmil ke paikar men jise DhunDh rahe hain
ḳhaka bhi ‘salim’ is ka nazar men nahin rakkha
Leave a Reply