Saleem Shahid
ye faisla bhi mire dast-e-ba-kamal men tha
jo chhinne men maza hai vo kab saval men tha
kis aftab ki aahaT se shahr jaag uTha
vagarna main bhi kahin mast apne haal men tha
tire bayan ne dikhaya jo aa.ina to khula
ki har shu.ur mire gosha-e-ḳhayal men tha
mire safar ke liye roz-o-shab bane hi nahin
tumhin kaho ki main kab qaid-e-mah-o-sal men tha
ragon men reg-e-ravan tha gurez-pa.i ka
lahu asiir ajab ḳhvahishon ke jaal men tha
mire gurez ne ahd-e-sitam ko tuul diya
ye eqtidar to kab se yunhi zaval men tha
ajiib lams ki lazzat hai meri banhon men
vahi maza hai jo us ḳhvab ke visal men tha
Leave a Reply