bhare jahan men koi razdar bhi na mila
qarar DhunDne nikle qarar bhi na mila
ye meri soḳhta-baḳhti nahin to phir kya hai
vo phuul laa.e to mera mazar bhi na mila
na jaane kaisi karamat thi dast-e-saqi men
ba-qaid-e-hosh koi hoshiyar bhi na mila
chaman chaman men udasi ka bol-bala hai
bahar kaisi nishan-e-bahar bhi na mila
bahut the aish ke lamhon men jan-nisar apne
paḌa jo vaqt koi gham-gusar bhi na mila
main apne gaanv men rah kar bhi ajnabi hi raha
mujhe to apnon se thoḌa sa pyaar bhi na mila
ḳharab hi rahi qismat ḳhizan-nasibon ki
bahar aa.i to lutf-e-bahar bhi na mila
hansi to apna muqaddar na thi magar ‘kausar’
hamen to rone pe kuchh iḳhtiyar bhi na mila
Leave a Reply