Sulagti Yaad Se KHun at Na Jae

Hanif Tarin

sulagti yaad se ḳhuun aT na jaa.e

dhuen se dil ki khaa.i paT na jaa.e

na.i fikron se bheja phaT na jaa.e

jo gham mera hai sab men baT na jaa.e

sarabon ko jala.e rakh ki jab tak

ye chiḳhen marti shab haT na jaa.e

musalsal barish-e-uftad sah kar

saḌak paima.ishon ki kaT na jaa.e

badan ka ghar hai dimak phailne se

ye Dar hai dil ka rauzan chaT na jaa.e

sada-e-rang chhu kar paniyon ka

ghaTa taḳhliqiyat ki chhaT na jaa.e

‘hanif’ aaya hai tum se chand milne

darazi dekho shab ki ghaT na jaa.e