ab kis se kahen ki kya hua tha
ik hashr yahan bapa raha tha
dastar ki paanv men paḌi thi
sardar kisi pe hans raha tha
vo shaam guzar ga.i thi aa ke
ranjur udaas main khaḌa tha
dahliz jakaḌ rahi thi paanv
pindar magar uḌa hua tha
sad shukr gaḌha hua tha qissa
kam-baḳht yaqin aa gaya tha
ik baar hi aazma to lete
dar band na tha bhiḌa hua tha
shab-ḳhun men raushni bahut thi
tha kaun jo dekhta raha tha
juzdan men ayaten chhupi thiin
gul-dan men phuul khil raha tha
ik shaḳhs ki tha vafa ka paikar
vo shaḳhs bhi ma.il-e-jafa tha
dastur vahi tha hasb-e-dastur
insaf ka qatl ho raha tha
kuchh phuul khile hue the ghar men
kuchh yaad se dil mahak raha tha
kuchh ashk gire hue the ḳhat par
ik lafz tha jo miTa hua tha
us shaam tha dil bahut akela
main hanste hanste ro paḌa tha
thi baat bahut zara si ‘ahmad’
is dil ko na jaane kya hua tha
Leave a Reply