Ayub Khawar
sochon men lahu uchhalte hain
ham apni tahon men jhankte hain
duniya ki hazar nematon men
ham ek tujhi ko jante hain
ankhon se dukhon ke rang aḳhir
saras ki uḌaan uḌ ga.e hain
savan ki tarah hamen bhigo kar
badal ki tarah guzar ga.e hain
yuun bhi hai ki pyaar ke nashe men
kuchh soch ke log ro paḌe hain
vo dukh to ḳhushi ke baab men the
ye dukh jo tulu ho rahe hain
jo kuchh bhi hai dil ke aa.ine men
sab teri nazar ke zaviye hain
bahte hue do badan samundar
honTon ke kinare aa mile hain
kuchh bhi to nahin hai paas ‘ḳhavar’
bas ek ana hai rat-jage hain
Leave a Reply