itnī ūñchā.ī se dhartī kī ḳhabar kyā jaane
us ko miTTī ne hī paalā hai shajar kyā jaane
dafn hote na hasīñ ḳhvāb adhūre lekin
apne marne kī ghaḌī koī bashar kyā jaane
jis musāfir kā patā pūchh rahe ho us kī
umr guzrī hai masāfat meñ vo ghar kyā jaane
us ne nafrat ke sivā aur kabhī kuchh na kiyā
phir vo bad-zāt mohabbat kā asar kyā jaane
aaj mauqa hai to yāroñ se nibhā lo yaarī
kal phir ‘afrañg’ rahe kaun kidhar kyā jaane