Hakeem Manzoor
phuul ho kar phuul ko kya chahna
jab ye be-angan tha jab tha chahna
zaḳhm saare hi hain apne jism-zad
kis sabab un ka tamasha chahna
phir se ho tajdid-e-ḳhushbu sochiye
chahna aur vo bhi apna chahna
ek mushkil razdari chahiye
ek mushkil chahaton ka chahna
dast-giri ai nam ankhon vaali sub.h
chahna kya chahna kya chahna
chand ki aayat samundar par paḌho
chahna us ko to aisa chahna
hasb-za ‘manzur’ mera naam hai
kaam mera sab ka achchha chahna
Leave a Reply