Hamein to KHwahish-E-Duniya Ne Ruswa Kar Diya Hai

Hasan Abbas Raza

hamen to ḳhvahish-e-duniya ne rusva kar diya hai

bahut tanha the us ne aur tanha kar diya hai

ab aksar a.ine men apna chehra DhunDte hain

ham aise to nahin the tu ne jaisa kar diya hai

dhaḌakti qurbaton ke ḳhvab se jaage to jaana

zara se vasl ne kitna akela kar diya hai

agarche dil men gunja.ish nahin thi phir bhi ham ne

tire gham ke liye us ko kushada kar diya hai

tire dukh men hamare baal chandi ho ga.e hain

aur is chandi ne qabl az vaqt buḌha kar diya hai

ta.alluq toḌne men pahl mushkil marhala tha

chalo ham ne tumhara bojh halka kar diya hai

gham-e-duniya gham-e-jan se juda hone laga tha

‘hasan’ ham ne magar donon ko yakja kar diya hai