mere marne ki bhi un ko na ḳhabar di jaa.e
kis liye apnon ko taklif-e-safar di jaa.e
laakh ko le ke chalen ghair baḌi shaan ke saath
ghar se le ja ke ye chaurahe pe dhar di jaa.e
umr bhar tu ne ata ki hai mai-e-hosh-ruba
vaqt-e-aḳhir hai mai-e-hosh-asar di jaa.e
sim-o-zar se na sahi sabr-o-qana.at se sahi
mujh se ḳhuddar ki jholi bhi to bhar di jaa.e
gham se gham ho na ḳhushi se ho ḳhushi ka ehsas
aisi tadbir bhi ai dil koi kar di jaa.e
tab kahin ja ke mile manzil-e-irfan ka nishan
jab nigahon ko zaban dil ko nazar di jaa.e
dil ki hai kushta-e-bedad-e-falak ai ‘sahir’
is ko tabani-e-ḳhurshid-o-qamar di jaa.e
Leave a Reply