Muntazir Firozabadi
teri nigah-e-naz ke bismil na honge ham
har rang har faza men to shamil na honge ham
ik bevafa se ham ne yahan tak kaha kabhi
chahega gar ḳhuda bhi to hasil na honge ham
tanqid karne valon pe hansna paḌa hamen
mushkil vo chahte hamen mushkil na honge ham
sahil pe jaane vaale kabhi lauTte nahin
dhoke se bhi kabhi koi sahil na honge ham
ham ko hai ishq us se jo hai ‘jaun-elia’
ya.ani ki aap ke koi qabil na honge ham
ham ne to apne jism men ik dil ko maara hai
kya phir bhi sochte ho ki qatil na honge ham
maana sharab piite hain to kya hua miyan
ya.ani ki aap kahte hain fazil na honge ham
Leave a Reply