Rais Amrohvi
habs ke aalam men mahbas ki faza bhi kam nahin
rauzan-e-divar-e-zindan ki hava bhi kam nahin
shorish-e-zanjir-e-pa par hain agar pabandiyan
halke halke jumbish-e-zanjir-e-pa bhi kam nahin
gar sar-e-maqtal na ho zikr-e-butan ka hausla
hujra-e-tarik men yad-e-ḳhuda bhi kam nahin
rahrav-e-shab kyuun charagh-e-mah se daryuza-gari
raat andheri ho to jugnu ki ziya bhi kam nahin
laakh mohkam ho hisar-e-marhabi-o-antari
ghaziyon ka bazu-e-ḳhaibar-kusha bhi kam nahin
ahd-e-gul se sazish-e-bad-e-ḳhizan bhi kam na thi
shaḳh-e-gul se sozish-e-barq-e-bala bhi kam nahin
kya hua gar va.iz-o-mulla ke dil hain be-charagh
gosha-e-masjid men nanha sa diya bhi kam nahin
lazzat-e-bada hai jan-parvar magar ai ahl-e-zauq
zahr-e-ashk-o-qatra-e-ḳhun ka maza bhi kam nahin
Leave a Reply