Ajiz Matvi
hasraten aa aa ke jam.a ho rahi hain dil ke paas
karvan goya pahunchne vaala hai manzil ke paas
biich men jab tak thiin maujen un men shorish thi bahut
intishar un men hua jab aa gaiin sahil ke paas
nazr-e-qatil jaan jab kar di to baaqi kya raha
ab taḌapne ke alava hai hi kya bismil ke paas
gharq kar den meri kashti phir ye maujen dekhna
hashr tak paTka karengi apna sar sahil ke paas
bhiik dena to kuja kaasa bhi us ne le liya
main ab ik hasrat-zada huun kya hai mujh saail ke paas
ek ham hain ham ne kashti daal di gardab men
ek tum ho darte ho aate hue sahil ke paas
ḳhair ho ‘ajiz’ kahin aisa na ho dil duub jaae
ishq ke dariya men halchal ho rahi hai dil ke paas
Leave a Reply