Poet
padin ye kis ke jalve par nigahen
nigahen ban gaiin khud jalva-gahen
kahe mujh se na koi zabt-e-gham ko
abhi munh se nikal jaengi aahen
suluk apna hai un ke naqsh-e-pa par
yahi hain manzil-e-irfan ki rahen
unhen dekhen vo dekhen ya na dekhen
unhen chahen vo chahen ya na chahen
chalae the jinhon ne tiir dil par
ham ankhon men liye hain vo nigahen
natija hai ye aahen khinchne ka
hamen khinche liye phirti hain aahen
‘sharaf’ kis ne ye daali aankh men aankh
nigahon se nikal aaiin nigahen
Leave a Reply