aankh uthai nahin vo samne sau baar hue
hijr men aise faramush-gar-e-didar hue
kamil us firqa-e-zuhhad men utha na koi
kuchh hue to yahi rindan-e-qadah khvar hue
na uthi baith ke khaak apni tire kuche men
ham na yaan dosh-e-hava ke bhi kabhi yaar hue
subh le aaina us but ko dikhaya ham ne
raat aghyar se milne ke jo inkar hue
kuchh taajjub nahin gar ab ke falak tuut pade
aaj naale jo koi aur bhi do-char hue
misr men aaj tujhe dekh ke pachhtae hain
sada-lauhi se jo yusuf ke kharidar hue
mubtazil main hi to huun aap jo kahiye sach hai
raat jhagde to mujhi par sar-e-bazar hue
ye hain ‘azurda’ jo kahte hue shaian-allah
aaj daryuza-gar-e-khana-e-khummar hue