nur-afshan hai vo zulmat men ujalon ki tarah
ham ne puuja hai jise dil se shivalon ki tarah
ḳhun-e-ummid hua ḳhun-e-tamanna gaahe
dil chhalakta hi raha mai ke piyalon ki tarah
zindagi tere taghaful ki bhi had hai koi
is qadar naaz na kar zohra-jamalon ki tarah
jab faramosh karenge hamen duniya vaale
aur ubhar a.enge ham dil men ḳhayalon ki tarah
dil to kya chiiz hai ham ruuh men utre hote
tum ne chaha hi nahin chahne valon ki tarah
‘arsh’ be-baki-o-haq-goi hai maz.hab apna
ham na badlenge kabhi vaqt ki chalon ki tarah
Leave a Reply