Mohammad Sharfuddin Sahil
mahfuz nahin zauq-e-havas dast-e-fana se
qudrat ne navaza hai mohabbat ko baqa se
har harf-e-muqaddas hai haqiqat ka muhafiz
mansur hai ma.atub anal-haq ki sada se
resham ki tarah narm hai be-shak tira lahja
a.ina-e-dil TuuT gaya zarb-e-ana se
duzdida-nigahi ne dikhaya ye karishma
achchha hua bimar dava se na dua se
ta-umr sata.egi tujhe meri rifaqat
hai puḳhta mira rang-e-lahu rang-e-hina se
jab itr-fashan sair-e-gulistan ko vo aa.e
‘sahil’ mujhe bheja gaya paigham saba se
Leave a Reply