vahi yaksaniyat-e-sham-o-sahar hai ki jo thi
zindagi dast-ba-dil ḳhak-basar hai ki jo thi
dekh kar bhi tire jalve nahin dekhe jaate
vahi pabandi-e-adab-e-nazar hai ki jo thi
tujh se mil kar bhi gham-e-hijr ki talḳhi na miTi
ek hasrat si ye andaz-e-digar hai ki jo thi
sho.ala-e-dard bujhe der hui hai lekin
vahi tabindagi-e-dida-e-tar hai ki jo thi
tu miri jaan nahin ab magar ai jan-e-‘azim’
zindagi ab bhi tiri dast-nigar hai ki jo thi
Leave a Reply