Ghulam Husain Sajid
shaguft-e-ab se miTTi ko aa.ina karte
charagh sard na hote to zamzama karte
bahut se rang bhi rakhte hain taqat-e-parvaz
hava men sirf parinde nahin uḌa karte
asar na lijiye is garm-o-sard ka dil par
ki shor-o-shar se pareshan nahin hua karte
bandhe hue the mire haath bhi tumhari tarah
vafa sarisht men hoti to ham vafa karte
zamin oḌh ke so.e hain sahiban-e-ishq
ab us gali ke dariche nahin khula karte
ajiib pyaas thi us dil-ruba ki ankhon men
ham un ko chuum na lete to aur kya karte
bahut kushada thi ye arz-e-pak un par bhi
agar vo ghar se nikalne ka hausla karte
jagah na dete kisi ḳhauf ko kabhi dil men
kisi se ishq jo karte to barmala karte
agar ḳharab hue mehr-o-mah ke hathon
kisi charagh ke haq men to kuchh dua karte
ḳhayal un ko na hota agar mohabbat ka
kabhi vo niind men chalte na rat-jaga karte
badal diya hai zamane ne us ko bhi ‘sajid’
phir ek baar kabhi us se rabta karte
Leave a Reply