mudava habs ka hone laga ahista ahista
chali aati hai vo mauj-e-saba ahista ahista
zara vaqfa se niklega magar niklega chand akhir
ki suraj bhi to maghrib men chhupa ahista ahista
koi sunta to ik kohram barpa tha havaon men
shajar se ek patta jab gira ahista ahista
abhi se harf-e-rukhsat kyuun jab aadhi raat baaqi hai
gul o shabnam to hote hain juda ahista ahista
mujhe manzur gar tark-e-ta’alluq hai raza teri
magar tutega rishta dard ka ahista ahista
phir is ke baad shab hai jis ki had subh-e-abad tak hai
mughanni shaam ka naghma suna ahista ahista
shab-e-furqat men jab najm-e-sahar bhi duub jaate hain
utarta hai mire dil men khuda ahista ahista
main shahr-e-dil se nikla huun sab avazon ko dafna kar
‘nadim’ ab kaun deta hai sada ahista ahista
Leave a Reply