yahi nahin hai ki shanon se ḳhuun bahta hai
abhi to apni miyanon se ḳhuun bahta hai
vo gaal surḳh hue hon to yuun lagen jaise
safed reshmi thanon se ḳhuun bahta hai
ye ḳhamushi vo bala hai ki chiḳh uTThe agar
to sunne valon ke kanon se ḳhuun bahta hai
hamare ḳhvab paTakte hain yuun hamare sar
tamam raat sirhanon se ḳhuun bahta hai
vo jang jiit ke unTon ka ruḳh badalne lage
abhi to un ki machanon se ḳhuun bahta hai
ye apne daur ke sab se baḌe munafiq hain
isi liye to zabanon se ḳhuun bahta hai
tamam vaqt guzarta hai zaḳhm sahlate
tarah tarah ke bahanon se ḳhuun bahta hai
hamen to ilm sikhaya nahin hai thonpa hai
hamare ilmi ḳhazanon se ḳhuun bahta hai
na jaane kitne zamane guzar ga.e sahir
na jaane kitne zamanon se ḳhuun bahta hai
Leave a Reply