bas farq is qadar hai gunah o savab men
piiri men vo rava hai ye jaa.ez shabab men
tasir-e-jazb-e-shauq ka ye sehr dekhiye
ḳhud aa ga.e hain vo mire ḳhat ke javab men
aḳhir taḌap taḌap ke ye ḳhamosh ho gaya
dil ko sukun mil hi gaya iztirab men
anhken mila ke ya to inayat ho ek jaam
ya zahr hi mila do hamari sharab men
ruḳh aftab honT kanval chaal hashr-ḳhez
kis shai ki ab kami hai tumhare shabab men
duniya men DhunDhte rahe ham rahaten abas
duniya ki rahaten to hain tere itaab men
‘sahir’ ajiib shai hai mohabbat ka dard bhi
dil mubtala hai ek musalsal azaab men
Leave a Reply