Khalid Jamal
baat ye hai ki koi baat purani bhi nahin
aur is ḳhaak men ab koi nishani bhi nahin
ye to zahir men tamavvuj tha bala ka lekin
ye badan mera jahan koi ravani bhi nahin
ya to ik mauj-e-bala-ḳhez hai meri ḳhatir
ya ki mashkiza-e-jan men kahin paani bhi nahin
baat ye hai ki sabhi bhaa.i mire dushman hain
mas.ala ye hai ki main yusuf-e-sani bhi nahin
sach to ye hai ki mire paas hi dirham kam hain
varna is shahr men is darja girani bhi nahin
saare kirdar hain angusht-ba-dandan mujh men
ab to kahne ko mire paas kahani bhi nahin
ek benam-o-nasab sach mira iz.har hua
varna alfaz men vo sail-e-ma.ani bhi nahin
Leave a Reply