Munawwar Lakhnavi
sukun mil gaya hai qarar aa gaya hai
kisi par hamen e’tibar aa gaya hai
qafas men bhi kaisi bahar aa ga.i hai
qafas men jo zikr-e-bahar aa gaya hai
un ankhon ko dekha hai maḳhmur jab se
in ankhon men bhi kuchh ḳhumar aa gaya hai
mala hai dam-e-sub.h-e-shabnam ne ghaza
ye kyuun ru-e-gul par nikhar aa gaya hai
‘munavar’ ko dekha to kuchh log samjhe
sar-e-bazm ik bada-ḳhvar aa gaya hai
Leave a Reply