Sukun Mil Gaya Hai Qarar Aa Gaya Hai

sukūñ mil gayā hai qarār aa gayā hai

kisī par hameñ e’tibār aa gayā hai

qafas meñ bhī kaisī bahār aa ga.ī hai

qafas meñ jo zikr-e-bahār aa gayā hai

un āñkhoñ ko dekhā hai maḳhmūr jab se

in āñkhoñ meñ bhī kuchh ḳhumār aa gayā hai

malā hai dam-e-sub.h-e-shabnam ne ġhāza

ye kyuuñ rū-e-gul par nikhār aa gayā hai

‘munavār’ ko dekhā to kuchh log samjhe

sar-e-bazm ik bāda-ḳhvār aa gayā hai

Leave a Comment