chup hain huzur mujh se koi baat ho ga.i
ya phir kisi se aaj mulaqat ho ga.i
taaza lagi thi choT ki mausam badal gaya
aur dekhte hi dekhte barsat ho ga.i
yuun to diye fareb kisi aur ne unhen
lekin gunahgar miri zaat ho ga.i
aa.e to dil men pyaar ka chashma ubal paḌa
aur chal diye to dard ki bohtat ho ga.i
chunte ho tirgi men bhi taaza ghazal ke phuul
kya soch teri vaqif-e-halat ho ga.i
ham ne kiya saval to vo chup rahe ‘hasan’
lo aaj apni baat ḳhurafat ho ga.i
Leave a Reply