Zulfiqar Aadil
peḌon se bat-chit zara kar rahe hain ham
nadida doston ka pata kar rahe hain ham
dil se guzar raha hai koi matami julus
aur is ke raste ko khula kar rahe hain ham
ik aise shahr men hain jahan kuchh nahin bacha
lekin ik aise shahr men kya kar rahe hain ham
palken jhapak jhapak ke uḌate hain niind ko
so.e huon ka qarz ada kar rahe hain ham
kab se khaḌe hue hain kisi ghar ke samne
kab se ik aur ghar ka pata kar rahe hain ham
ab tak koi bhi tiir tarazu nahin hua
tabdil apne dil ki jagah kar rahe hain ham
hathon ke irti.ash men bad-e-murad hai
chalti hain kashtiyan ki dua kar rahe hain ham
vapas palaT rahe hain azal ki talash men
mansuḳh aap apna likha kar rahe hain ham
‘adil’ saje hue hain sabhi ḳhvab ḳhvan par
aur intizar-e-ḳhalq-e-ḳhuda kar rahe hain ham
Leave a Reply