viran bahut hai ḳhvab-mahal jagte raho
ham-sa.e men khaḌi hai ajal jagte raho
jis par nisar nargis-e-shahla ki tamkenat
vo aankh is ghaḌi hai sajal jagte raho
ye lamha-e-umid bhi hai vaqt-e-ḳhauf bhi
hasil na hoga is ka badal jagte raho
jin bazuon pe charagari ka madar tha
vo to kabhi ke ho ga.e shal jagte raho
zehnon men tha irada-e-shab-ḳhun kal talak
ab ho raha hai ru-ba-amal jagte raho
jis raat men na hijr ho ne vasl ‘ajmali’
us raat men kahan ki ghazal jagte raho
Leave a Reply