hasrat ai jaan shab-e-judai hai
muzhda ai dil ki maut aai hai
tujh se maghrur ki jhuki gardan
phir bhi ik shan-e-kibriyai hai
us ne talvar ko sambhala hai
dekhiye kis ki maut aai hai
phir gaya jab se vo sanam ba-khuda
ham se bargashta ik khudai hai
baat sidhi bhi vo nahin karta
kaj-adai se kaj-adai hai
aap ko janta hai aina
saaf ye us ki khud-numai hai
tum mire kaj-kulah ko dekho
ye bhala kis men mirzai hai
dil men aata hai rah-e-chashm se vo
khuub ye rah-e-ashnai hai
male hasrat se haath dekh ke huur
ai pari teri vo kalai hai
shana us ka hai panja-e-khurshid
vaah kya panja-e-hinai hai
zahido qudrat-e-khuda dekho
but ko bhi dava-e-khudai hai
haath pahuncha na pa-e-qatil tak
taleon ki ye na-rasai hai
kaabe jaane se mana karte hain
kya buton ke hi ghar khudai hai
husn ne mulk-e-dil kiya taraj
hazrat-e-ishq ki duhai hai
munh hai ‘goya’ ka us ka bosa le
baat dushman ne ye banai hai
Leave a Reply