Aftab Hussain
dekhe koi taalluq-e-khatir ke rang bhi
us fitna-khu se pyaar bhi hai aur jang bhi
dil hi nahin hai us ke tasavvur men shad-kam
ik sarkhushi men jhumta hai ang ang bhi
kuchh rabt-e-khas asl ka zahir ke saath hai
khushbu ude to udta hai phulon ka rang bhi
aisa nahin ki aath pahar be-dili rahe
bajte hain gham-kade men kabhi jal-tarang bhi
dekha hai aaj us ne mujhe mud ke ‘aftab’
is vaqiye pe khush bhi huun main aur dang bhi
Leave a Reply