Sahir Dehlavi
sar-e-arsh-e-barin hai zer-e-pa-e-pir-e-mai-ḳhana
kamal-e-auj par hai husn-e-alamgir-e-mai-ḳhana
farogh-e-bada se raushan hui taqdir-e-mai-ḳhana
ki hai har bada-kash raushan charagh-e-pir-e-mai-ḳhana
main divana huun aur dair-o-haram se mujh ko vahshat hai
paḌi rahne do mere paanv men zanjir-e-mai-ḳhana
tasavvur dil men rahta hai kisi ki chashm-e-mai-gun ka
khinchi rahti hai ankhon men mire tasvir-e-mai-ḳhana
ziyarat ko chale hain shaiḳh-o-zahid fi-amanillah
ḳhuda ki shaan hai kuchh phir ga.i taqdir-e-mai-ḳhana
pari shishe men aur saghar men hai ḳhurshid-e-nurngin
vo hai tasḳhir-e-mai-ḳhana ye hai tanvir-e-mai-ḳhana
jo pahuncha mai-kade men chhoḌ kar dair-o-haram ‘sahir’
jhuka sar zauq-e-masti men zahe tasir-e-mai-ḳhana
Leave a Reply