ham apne-ap ki pahchan le ke aa.e hain
na.e suḳhan na.e imkan le ke aa.e hain
hava ne vaar kiya to javab pa.egi
ki ham charagh bhi tufan le ke aa.e hain
charagh-e-qurb se kar dijiye unhen raushan
bujhe bujhe se kuchh arman le ke aa.e hain
javab de na sakega hamari baton ka
ki aap aa.ina hairan le ke aa.e hain
in ansuon ka koi qadr-dan mil jaa.e
ki ham bhi ‘mir’ ka divan le ke aa.e hain
hamare paas faqat dhuup hai ḳhayalon ki
jhulaste ḳhvabon ki dukkan le ke aa.e hain
ye zaḳhm-e-dil nahin ehsan ki nishani hai
ham us nigah ka ehsan le ke aa.e hain
jo parsa ho to kyuun imtihan se Darte ho
ham e’tibar ka mizan le ke aa.e hain
unhin pe saare masa.ib ka bojh rakkha hai
jo tere shahr men iman le ke aa.e hain
Leave a Reply