Farooq Bakshi
bichhaḌna mujh se to ḳhvabon men silsila rakhna
dayar-e-zehn men dil ka diya jala rakhna
palaT ke a.enge mausam to tum ko likkhunga
kitab-e-dil ka varaq tum zara khula rakhna
main chahta huun vo ankhen jo roz milti hain
kabhi to mujh se kahin ham pe aasra rakhna
badan ki aag se jhulse na jism ruhon ka
qarib aa ke bhi tum mujh se fasla rakhna
udaas lamhon ke mausam guzar hi ja.enge
kisi ki baat ka ab dil men kya gila rakhna
jo chal paḌe ho mare saath tapti rahon par
kahin utaar ke phulon ki ye qaba rakhna
Leave a Reply