Purnam Allahabadi
vo aankh mere liye nam hai kya kiya jaa.e
use bhi aaj mira gham hai kya kiya jaa.e
tire baghair kahin mera ji nahin lagta
tire baghair ye aalam hai kya kiya jaa.e
sahar qarib hai ab kya vo a.enge milne
umid-e-vasl bahut kam hai kya kiya jaa.e
ḳhata maaf ḳhata.en to ham se hongi zarur
ki ye to fitrat-e-adam hai kya kiya jaa.e
ilahi ab koi chara nahin dua ke siva
mariz-e-hijr lab-e-dam hai kya kiya jaa.e
vo mujh se milne ko aa.e hain meri maut ke ba.ad
ḳhushi bhi mere liye gham hai kya kiya jaa.e
baraste rahte hain din raat hijr men ‘purnam’
ye hal-e-dida-e-pur-nam hai kya kiya jaa.e
Leave a Reply