Athar Nasik
pahuncha diya umiid ko tufan-e-yas tak
bujhne na di furat ne bachchon ki pyaas tak
pahle to dastaras thi shajar ke libas tak
lekin ḳhizan ne noch liya sab ka maas tak
chhiḌka gaya hai zahar daraḳhton pe is qadar
talḳhi men Dhal ga.i hai phalon ki miThas tak
is baar bhi libas ko tarsengi chunniyan
ye raunaqen hain chehron pe khilti kapas tak
kaghaz pe us ki shakl banata huun raat bhar
‘nasik’ nahin huun jis ka main chehra-shanas tak
Leave a Reply