hatim-ali-mehr

Izaen Uthae Hue Dukh Pae Hue Hain

izaen uthae hue dukh paae hue hain

ham dil se ba-tang aae hain uktae hue hain

betab hain bechain hain ghabrae hue hain

ham dil se ba-tang aae hain uktae hue hain

un honthon ke bose ka maza paae hue hain

pyaar aaya hai munh takte hain lalchae hue hain

zulfen vo bala ji ko jo uljhae hue hain

juude ke ulat beach men dil aae hue hain

ghusse men bhare baithe hain jhallae hue hain

afrokhta hain ghairon ke bhadkae hue hain

darvaze pe baithe hain nikalvae hue hain

ham ne to Dhahi di vo ghazab Dhaae hue hain

ithlae hue baithe hain itrae hue hain

ab ruup hai joban pe hain gadrae hue hain

kya baat hai kya baat hai teri lab-e-jan-bakhsh

aisi bhi tire ahd men dam khaae hue hain

mujh par unhen rahm aae ye mumkin hi nahin hai

aise vo samajhte nahin samjhae hue hain

karta ghazab ab tak to hamara dil-e-betab

roke hue Dante hue dhamkae hue hain

hangama rahega yuun hi kuche men tumhare

ashiq kahan ja sakte hain dil aae hue hain

aaen to inayat hai nahin aate na aaen

ham dil ko tasavvur hi se bahlae hue hain

dil thahar gaya zakhm-e-jigar bhar gae apne

aram hi ham tum ko jo liptae hue hain

marne pe bhi afsurda-dili apni ayaan hai

turbat pe miri phuul bhi murjhae hue hain

aghyar-e-siyah-ru se bahut rabt hai un ko

vo chand hain ai ‘mehr’ to gahnae hue hain

More Poems

Leave a Comment