Arsh Malsiyani
agar taqdir teri ba.is-e-azar ho jaa.e
tujhe lazim hai us se bar-sar-e-paikar ho jaa.e
miri kashti hai main huun aur girdab-e-mohabbat hai
jo tu ho na-ḳhuda mera to beḌa paar ho jaa.e
kamal-e-zabt-e-gham se ye gavara hi nahin mujh ko
ki harf-e-arzu sharminda-e-iz.har ho jaa.e
tere ḳhvab-e-giran par ai dil-e-nadan ta.ajjub hai
ki tu sota rahe saara jahan bedar ho jaa.e
unhen kyuun kosta hai jo tujhe kahte hain kam-himmat
bura kya hai haqiqat ka agar iz.har ho jaa.e
tumhen ai arsh kyuun hai tir-e-gham se itni be-zari
yahi behtar hai ye navak jigar ke paar ho jaa.e
Leave a Reply